Планинарско друштво Макпетрол

Планинарско Спортско Друштво МАКПЕТРОЛ Скопје	> Макпетрол Home

	Почетна страна
	Годишна програма
	Акции
	Документи
	Историја
	Библиотека
	Високогорство
	Topo Maps
	Контакт
	Линкови

Шарпланинска есенска прикаска - 24 октомври 2010

Имаше повеќе заинтересирани планинари за неделното искачување до врвот Бакардан но на пат тргнаа сите двајца (Перо и Марин). Временската прогноза беше идеална, терминот за поаѓање од Скопје 05:30h, а целта ни беше да го видиме изгрејсонцето, згазнеме и допреме за прв пат оваа есен ново снекче, појдеме до Бакардан, се надишиме воздух, фотографираме, уживаме во се наоколу и така освежени се вратиме назад до 18h, па малку одмор по дома, и потоа вечерта на Jazz, но не испадна така, ама ниту Перо ниту јас не се лутиме, туку би посакале на сите Вас што ќе го читате текстов да Ви се случи нешто слично.

Многу пати сум бил по оваа маршута, ама за прв пат во еден ист ден да доживеам да се поклопат толку убави, и ретки нешта кои остануваат и долго се паметат, а се започна со претрчувањето на средно голем волк на 7 - 8 метра пред нас на патот на едно 5 минути возење после почетокот на успонот од Тетово кон Шапка околу 06h наутро, за да заврши со средбата на паркингот со Лазе и неговите BIKE -Downhill другари кои убавиот ден го искористиле спуштајќи се по Церипашинааааа., а некои скокнале до Лешница и назад, се за полни срца и мераци.

изгрејсонцето...

А почетокот на средината од овој убав ден започна со изгрејсонцето 07h, полната месечина на спротивната страна, па искачувањето по Церипашина, светлината на утрото, покасно на денот, сонцето, свежината, снекчето, кристалниот ден и апсолутно тивко и мирно време како што многу ретко се начекува. Зошто, па затоа што така беше се до Титов врв и назад. По планот требаше да стигнеме до Бакардан, ама кога видовме дека се е на наша страна и кога во 09:17h, на половина успон на Казаните од ниска смрека на метар од мене нешто шушна, ја прекина таа волшебна тишина, ме уплаши и истрча како куршум нагоре кон крајот на успонот еден сочен, средно голем шарпланински зајак и во миг ми излета : ЗАЈАААААК, а Перо веднаш реагираше и зајакот го сними, ама дерењето не. Прв пат на таква височина да видам зајак и тогаш решивме да одиме до Титов врв, а се надевавме дека како ни тргнало има шанса и некоја дивокоза да видиме, но наместо дивокоза на врвот имавме средба со вистински ловци наоружани со вистински пушки и по разговорот на "високо" со нив, а покасно и на спуштање до седлото меѓу Титов врв и Бакардан станавме и другари.

по Церипашина - десно - снекче на Антени - лево Бориславец

Шарпланинската трилогија (Титов врв, Мал Турчин, Бакардан) појачана со Бориславец

Со Перо прв пат сум на Титов врв и ми се чини дека тој беше џокерот за се ова што го доживеавме, а исто тој е виновен и за преубавите фотки кои излегуваа сериски како од неговиот, така и од мојот апарат, а кои еве дел од нив и Вам Ви подаруваме, а тишината и мирот на тој 24.10.2010 останува сами да си ја доловите.

поглед кон гребенот Љуботен - Пирибег - Црн Врв - Кобилица - Вртоп