Во недела - 16-февруари-2014 група од 15 вљубеници во слободно трчање по терени во природа се собравме во Катлановска Бања на стартот на патешествието за тој ден. Интересно е дека и во месец ноември кога трчавме тука исто така бевме 15 души. За овој пат беа предвидени две делници - стандардната од 21 km и подолга - за оние кои треба да се спремаат за ултра-планинските трки и други големи потфати во наредниот период - 57 km. Иако прогнозата ветуваше дека во текот на денот температурата ќе се качи до 15 степени, сепак не пречека свежо утро со температура близу до нулата. Затоа на брзинка се спремивме и појдовме да трчаме - за да што побргу се загрееме.
![](../Galerija/KatlanovoRun-Fev-2014/Img-00100.JPG)
на стартот кај црквичката во Катлановска Бања
Појдовме околу 8 часот двете групи заедно - по убавото сртче над Катлановска Бања. Се спуштивме до село Катланово и тука двете групи се разделивме - секој на своја страна. Во меѓувреме се загреавме и веќе беше многу пријатно за трчање. Првата гупа појде по асфалтниот пат директно кон село Блаце, а нашата група по патот кон Фазанеријата и оттаму се упативме по некои многу пријатни патеки од спротивната страна на ридовите - кон текот на реката Вардар - Зелениково, Тао, Пакошево, Ново Село.
![](../Galerija/KatlanovoRun-Fev-2014/Img-00200.jpg)
по сртот над бањата
![](../Galerija/KatlanovoRun-Fev-2014/Img-00500.JPG)
по патчињата во правец на Ново Село и Пакошево
Над главите неколку пати ни пролетуваа, на прилично мала висина големи патнички авиони - тука е рутата за спуштање на авионите на Скопскиот аердром. Се спуштивме прво до Ново Село, па по асфалтот продолживме низводно до следното село Пакошево каде ја направивме првата мала пауза од 5-10 минути. Потоа се искачивме на ридот над селото и продолживме до врвчето каде што имаше предавател и една камена кула Од тука се пружаше одлична глетка на почетокот на Таорската клисура, селото Зелениково, а во далечините рбетот на Шар Планина со Љуботен како најистакнат - малку одвоен од останатите врвови.
поглед кон Зелениково и назад - Шар Планина
Потоа тргнавме назад - но по други патчиња - на некои места имаше кал, некаде патеките беа подзараснати ма млаку се пробивавме низ грмушки - но за среќа овој пат сосем малку. Наскоро стигнавме до селото Блаце каде ја правиме втората пауза и дополнуваме вода од дворовите на љубезните домаќини. Продолжуваме по асфалниот пат кон село Кожле. Од селото се спуштаме во десно - кон текот на реката Вардар. На овој терен бевме минатиот пат и бидејќи ни се допадна решивме пак да го поминеме. Пријатна патека за трчање покрај реката Вардар и по некое време пристигнуваме до местото каде што се влива реката Пчиња во Вардар.
![](../Galerija/KatlanovoRun-Fev-2014/Img-01300.JPG)
покрај реката Вардар
![](../Galerija/KatlanovoRun-Fev-2014/Img-01600.JPG)
на висечкиот мост на Вардар
![](../Galerija/KatlanovoRun-Fev-2014/Img-01800.JPG)
на вливот на Пчиња во Вардар
Продолжуваме од другата страна со искачување по многу убава патека која оди до село Кожле. Во Кожле правиме мала пауза и потоа се спуштаме до село Бадар. Наскоро после селото се минува преку мост реката Пчиња и се оди кон викенд-населбата. Од тука се одвојува во десно па кон село Брезница. Киломерите се множат, а и времето станува прилично топло, ни се зацрвенија лицата и вратовите. Од село Брезница по убава патека спуштање до Катлановска Бања каде што не чекаа автомобилите. Мал одмор, преслекување и назад кон Скопје - на заслужен одмор.
![](../Galerija/KatlanovoRun-Fev-2014/Img-01900.JPG)
патеката кон село Кожле
Технички податоци :
Должина на првата патека : 21 km
Висинска разлика : 600 m
Должина на втората патека : 57 km
Висинска разлика : 1700 m
![](../Galerija/KatlanovoRun-Fev-2014/Katlanovo-Google.jpg)
приказ на изминатите патеки
![](../Galerija/KatlanovoRun-Fev-2014/Katlanovo-Profile.jpg)
висински профил на подолгата патека
Текст и фотографии : Трајче Панковски